Häerzlech Wëllkomm bei der 
Landjugend & den Jongbaueren Zenter

Op villen Ebenen aktiv



Nieft Berodung an Diskussiounen iwwer allgemeng Themen, déi fir äis wichteg sinn, zielt d’Virbereedung op d'Liewen an op déi gesellschaftlech Erausfuerderungen zu den Haaptaufgaben vun eiser Organisatioun, déi parteipolitesch a gewerkschaftlech neutral ass. Doniewend maache mir äis staark fir d’Entwécklung vum ländleche Raum - sief dat heiheem oder am Kader vun der Entwécklungszesummenaarbecht an Afrika.



Deemno organiséieren mir regelméisseg Informatiounsowender fir eis Memberen a Symphatisanten, wou berufsspezifesch Themen behandelt ginn. Dës Weideren organiséiere mir all Joer een Inlandstour mat Visite vun engem Industrie-Betrib an engem Bauerebetrib.


Ausser dësen méi sérieusen Aufgaben leeë mir awer och Wäert drop, fir vill fräizäitlech a kulturell Aktivitéiten mateneen ze ënnerhuelen. Am Wanter probéieren mir eis Kenntnisser a Coursen ze verbesseren, wéi beispillsweis mat engem Kachcours oder engem Danzcours.

Highlights Déi jonk an dynamesch Landjugendgrupp Zenter kann op vill grouss Manifestatiouen zréckkucken. Si huet de 4. Landjugenddag am Joer 1978 zu Grousbous, den 12. Landjugenddag am Joer 1986 zu Useldéng, den 20. Landjugenddag am Joer 1994 zu Brouch, den 28. Landjugenddag am Joer 2002 am Preizerdaul an dëst Joer den 35. Landjugenddag zu Ell organiséiert.
Engagement keen eidelt Wuert Wéi uewen scho kuerz ernimmt, ass am Zenter d’Solidaritéit mat de manner bemëttelte Länner keen eidelt Wuert. Zënter 1991 organiséiere mir regelméisseg den Dag vun der Kooperatioun. Den Erléis vun dëser flotter Manifestatioun fléisst jeeweils integral an Kooperatiounsprojeten vun der ONG Lëtzebuerger Jongbaueren a Jongwënzer – Service Coopération a.s.b.l.. Nieft dëse regionalen Aktivitéiten si mir och bei de verschiddenen Manifestatiounen mat derbäi, déi op nationalem Plang vun der Lëtzebuerger Landjugend an de Lëtzebuerger Jongbaueren a Jongwënzer organiséiert ginn, wéi beispillsweis de gemeinsame Stand op der Foire Agricole zu Ettelbréck, d’36-Stonnen-Aktioun, wou e Projet an enger Gemeng realiséiert gëtt. Doniewent loosse mir äis awer och kaum eng Aktivitéit vun deenen aanere sechs regionale Gruppen vun der Lëtzebuerger Landjugend – Jongbaueren a Jongwënzer laanscht d'Nues goen

Landjugend-Power-Aktioun an der Gemeng Biekerech


Een hëlzenen Iwwerdaach fir d’Kanner aus dem Precoce zu Uewerpallen



Den 30. an 31. August war d’Landjugend Zenter zu Uewerpallen am Kader vun hirer Landjugend-Power-Aktioun aktiv. Bei dëser Aktioun, déi zënter dem Joer 2000 an am Rhythmus vun 2 Joer leeft, engagéieren sech déi 7 regional Landjugendgruppe vun der Lëtzebuerger Landjugend a.s.b.l. (LLJ-Cliärref, LLJ-Dikkrich, LLJ-Furen, LLJ-Maacher, LLJ-Süden, LLJ-Uewersauer, LLJ-Zenter) op benevoler Basis, fir e Projet am Interessi vun der Allgemengheet ze realiséieren. Während der Aktioun, déi sech op 36 Stonne limitéiert, hunn d’Memberen aus de Gruppe vun der Landjugend d’Aufgab, eng gemeinschaftlech Aarbecht duerchzeféieren, déi der lokaler Bevëlkerung am ländleche Raum zegutt kënnt.

D’Landjugend Zenter, där hir Memberen haaptsächlech aus dem Dekanat Osper a Miersch kommen, hat dëst Joer d’Gemeng Biekerech fir hir 36-Stonnen-Aktioun erausgesicht. Gespaant hunn d’Membere vum Zenter den 30. August moies op de Projet gewaart, deen de Schäfferot hinnen als Optrag sollt ginn: 

Zu Uewerpallen bei der Schoul kruten si dee Moment d’Aufgab, een Iwwerdaach aus Holz mat enger Suebelkëscht an den nächste 36 Stonnen ze bauen. De ganze Weekend waren eng 20 Membere vun der Landjugend mat vill Engagement aktiv, fir dëse Projet ze realiséieren. Sonndes owes um 8 Auer konnt den Iwwerdaach an d‘Suebelkëscht fäerdeg gestallt ginn an offiziell mat de Gemengeverantwortleche bei engem Patt ageweit ginn.

D’Landjugend Zenter seet der Gemeng Biekerech Merci fir dee flotte Projet a wënscht all de Klassen aus dem Precoce vill Spaass bei hiren Aktivitéiten ënnert dem Iwwerdaach an an der Suebelkëscht.

Vill Memberen vun der Landjugend waren den Weekend vum 30. An 31. August aktiv fir zu Uewerpallen een Iwerdaag ze bauen.
 
Den Comité vun der Landjugend Zenter mam Chefferoot vun der Gemeng Bierkeich beim  Aafschloss vun der 36 Stonnen Aktioun Sondes Owe